在日常生活學母語
金門話是咱世代相傳的文化寶藏，
共土地的記持佮鄉親的感情收囥在內。
語言毋但是溝通的工具，
閣較是承載文化上溫暖的主體。
為著欲予這份珍貴的聲音繼續流傳，
文化局特別規畫出版《金門話有聲書繪本》，
而且得著文化部「國家語言整體發展方案」的支持佮贊助，
這是一項誠有意義的文化工程。
這本繪本用金門特有的在地素材當做靈感，
共「迎城隍」遮的傳統節慶的風貌，
用圖相佮聲音交織呈現。
對廟埕鬧熱的陣頭、街路響亮的鑼鼓聲，
到囡仔人綴隊行踏的笑聲，
每一个畫面、每一段金門話的聲說，
若親像𤆬讀者親身到現場，
感受金門的風土佮人情。
咱希望會使透過這本《咚咚鏘來矣》的有聲書繪本，
毋但予囡仔佇閱讀的時陣自然倚近金門話，
嘛予閣較濟家庭佇日常生活中輕鬆學習、分享，
共這份語言的溫暖繼續湠落去。
相信只要逐家鬥陣投入，
金門話一定會佇時代的潮流中繼續發光，
成為連接過去佮未來重要的橋。
佇遮佮所有關心金門文化的朋友分享這份快樂，
也誠心誠意邀請恁做一下共書掀開、共耳機掛起來，
聽咱金門上貼心的鄉音。